बेल्जियममा मोल शहरमा रेस्टुरेन्ट ब्यवसाय गरिरहेका पर्बतका बीर फगामी पुनको सडक दुर्घटनामा बिहीवार दिउसो निधन भएकोछ । मोलबाट रेस्टुरेन्टको लागि समान किन्न र रेस्टुरेन्टका स्टाफलाई पिकअप गर्न एन्तवेरपेन जादै गरेका ५१ बर्षीय पुनको बेल्जियमको ई३४ हाइवेयमा दुर्घटना भएको हो ।
उनले चलाएको गाडी ट्रक सँग ठोक्किदा उनको म्रित्त्यु भएको बेल्जियम प्रहरीले बताएकोछ । प्रहरीले अस्पताल पुर्याउदा डाक्टरहरुले उनलाई म्रित घोषणा गरेका थिए । बिगत दुई दशकबाट बेल्जियम बस्दै आएका पुनको परिवारमा श्रीमती र दुई सन्तान छन ।
बेल्जियम प्रहरी सँग कुरा गरेका पुनका जिल्लाबासी रहेका बालेन्द्र गुरुङका अनुसार शुक्रबार प्रहरीले पुनको पार्थिब शरीर परिवारलाई बुझाउने र त्यस पछि अन्त्यष्ठिको लागि परिवारले समय तय गर्नेछ ।
सडक दुर्घटनामा पुनको निधनबाट स्तब्ध भएको बेल्जियमको नेपाली समुदायले उनको परिवार प्रति समबेदना र उनको आत्माको चीरशान्तिको कामना गरेकोछ ।
