काठमाडौं : यती एयरलाइन्सको विमान दुर्घटनामा परेका २ जनाको अवस्था अझै अज्ञात रहेको छ ।
विमानमा रहेका ७२ जनामध्ये ७० जनाको शव फेला परेको छ । ती मध्ये ४४ जनाको पहिचान खुलेको पोखरा स्वास्थ्य विज्ञान प्रतिष्ठानले जनाएको छ ।
चालक दलका सदस्यहरु, विदेशी नागरिक तथा पहिचान नखुलेका शवहरु पहिचान परीक्षणको लागि आज काठमाडौं ल्याउने तयारी गरिएको छ ।
दुर्घटनामा ज्यान गुमाएका क्रु मेम्बर, विदेशी र पहिचान नभएका शव मात्रै काठमाडौं पठाउन लागिएको हो ।
त्रिभुवन अन्तराष्ट्रिय विमानस्थल उद्धार तथा समन्वय केन्द्रका अनुसार ४६ जनाको शव काठमाडौं ल्याइने भएको छ । त्यस्तै २३ जनाको शव भने पोखराबाटै आफन्तलाई बुझाइने भएको छ ।
हालसम्म फेला परेका ७० शव पोखरा स्वास्थ्य विज्ञान प्रतिष्ठान, पश्चिमाञ्चल क्षेत्रीय अस्पतालमा राखिएको छ ।
मृतकका आफन्तले भने दुर्घटना भएको २४ घण्टाभन्दा बढी भइसक्दा समेत शव बुझ्न नपाएको भन्दै आक्रोश व्यक्त गरेका छन् ।
आइतबार काठमाडौंबाट पोखराका लागि उडेको यती एयरलाइन्सको विमान पोखरा विमानस्थल अवतरणका क्रममा सेतीको खोँचमा दुर्घटना भएको थियो । दुर्घटनाग्रस्त विमानमा चालक दलका चार सदस्यसहित ७२ जना सवार थिए ।
