काठमाडौं : सरकारले पोखरामा आइतबार भएको यती एयरलाइन्सको विमान दुर्घटनामा मृत्यु भएका व्यक्तिप्रति शोक मनाउन सोमबार सार्वजनिक बिदा दिने निर्णय गरेको छ ।
आइतबार दिउँसो बसेको मन्त्रिपरिषद बैठकले सोमबार बिदा दिने निर्णय गरेको प्रवक्ता विष्णु पौडेलले जानकारी दिए ।
यस्तै बैठकले दुर्घटनाको छानविन गर्न ५ सदस्यीय दुर्घटना जाँच आयोग गठन गरेको छ ।
बैठकले दुर्घटनाको कारण पहिचान गर्न र आगामी दिनमा यस्ता दुर्घटना हुन नदिन पूर्वसचिव नागेन्द्र घिमिरेको संयोजकत्वमा ५ सदस्यीय आयोग गठन गरेको हो ।
सदस्यमा हवाई विज्ञ नेपाली सेनाका अवकाशप्राप्त क्याप्टेन दीपकप्रकाश बास्तोला, अवकाशप्राप्त क्याप्टेन सुनिल थापा, जहाज मर्मत सम्भार विषयका इन्जिनियर एकराज जंग थापा रहेका छन् ।
सदस्य सचिवमा संस्कृति पर्यटन तथा नागरिक उड्डयन मन्त्रालय सहसचिव वुद्धिसागर लामिछाने रहेका छन् ।