काठमाडौं : विश्व फुटबलको सर्वोच्च निकाय फिफाले भारतमाथि अनिश्चितकालिन प्रतिबन्ध लगाएको छ ।
भारतीय फुटबल निकाय अल इन्डिया फुटबल फेडेरेसन ‘एआइएफएफ’ मा बाहिरी शक्ति हावी भएको भन्दै फिफाले प्रतिबन्ध लगाएको हो ।
फिफाको प्रतिबन्धसँगै भारतले अब फिफा र एएफसीको अन्तर्राष्ट्रिय प्रतियोगिता र क्लब प्रतियोगितामा सहभागिता जनाउन पाउने छैन ।
यस्तै भारतमा आगामी अक्टोबरमा तय भएको यू–१७ महिला विश्वकप पनि सर्ने भएको छ ।
गत मे महिनामा भारतको सर्वोच्च अदालतले एआईएफएफलाई विघटन गरेपछि विवाद उत्कर्षमा पुगेको थियो ।
त्यसपछि फिफाको टोलीले एआईएफएफलाई विधान जुलाइको अन्त्यसम्ममा परिमार्जन गर्न र सेप्टेम्बर १५ सम्ममा चुनाव गरिसक्न निर्देशन दिएको थियो ।
तर सो अनुसार चुनाव नभएको फिफाले जनाएको छ । फिफाले यसअघि नै पटक पटक चेतावनी दिएपनि विधान विपरित कार्य हुँदै आएको थियो ।
फिफाले विधानमा आफ्ना सदस्य संघहरू कानूनी र राजनीतिक हस्तक्षेपबाट मुक्त हुनुपर्ने प्रावधान राखेको छ ।
फिफाका अनुसार अब एआइएफएफमा आफ्नै कमिटीले कार्यसम्पादन शुरु गरेपछि मात्र फुकुवाको ढोका खुल्नेछ ।