एजेन्सी : श्रीलंकाको संसद्ले गोटाबाय राजपक्षले राष्ट्रपतिको पदबाट दिएको राजीनामा स्वीकृत गरेको छ ।
संसद्का सभामुख श्रीलंकाली संसदका सभामुख यापा अभयवर्धनले आफूले राजपक्षको राजीनामा स्वीकृत गरेको जानकारी दिएका हुन् ।
राजीनामा स्वीकृत भएसँगै श्रीलंकमा झन्डै २० वर्ष सत्तामा बसेको एउटा राजनीतिक परिवारको अन्त्य भएको छ ।
राजपक्षले राजीनामा दिएको थाहा पाएपछि प्रदर्शनकारीले कोलम्बोमा उत्सव मनाएका छन् ।
मुलुकमा प्रदर्शन चर्केपछि माल्दिभ्स हुँदै सिंगापुर पुगेर राजपक्षले बिहीवार राजीनामा दिएका थिए ।
प्रधानमन्त्री रनिल विक्रमसिंघेले आजै अन्तरिम राष्ट्रपतिका रूपमा शपथ लिने बताइएको छ ।
श्रीलंकाको संविधान अनुसार राष्ट्रपतिले राजीनामा दिएको अवस्थामा प्रधानमन्त्री कामचलाउ राष्ट्राध्यक्ष बन्छन् ।
उनलाई गोटाबायले कार्यबहाक राष्ट्रपतिको जिम्मेवारी दिएका थिए । राजपक्षको राजीनामासँगै नयाँ राष्ट्रपति छान्ने प्रक्रिया थाल्न बाटो खुलेको छ ।
सभामुखले नयाँ राष्ट्रपति छान्ने प्रक्रिया थाल्ने उद्देश्यले शनिवार संसद्को बैठक बोलाएका छन् ।
श्रीलंकाको कानून अनुसार संसद्ले ३० दिनभित्र नयाँ नेता छान्नुपर्नेछ । रनिल विक्रमसिंघे पनि राष्ट्रपतिका सम्भावित उम्मेदवार रहेका छन् ।
विपक्षी नेता सजित प्रेमदास पनि आकांक्षी रहेका छन् ।
आर्थिक संकटमा परेपछि राष्ट्रपतिका कारण देशको अर्थतन्त्र भताभुङ्ग भएको भन्दै जनतामा आक्रोश बढेको छ ।
पछिल्लो समय खाद्यान्न, इन्धन र अत्यावश्यक दैनिक उपभोग्य वस्तुको अभाव देखिएको छ ।
