काठमाडौं : काठमाडौं उपत्यकाका सात स्थानीय तहमा हैजाका बिरामी फेला परेका छन् ।
उपत्यकामा असार गतेदेखि देखिएको हैजा संक्रमण २२ गतेसम्म आइपुग्दा २१ जनामा संक्रमण देखिएको छ ।
इपिडिमियोलोजी तथा रोग नियन्त्रण महाशाखाका अनुसार हैजा संक्रमित सबैभन्दा धेरै देखिनेमा काठमाडौं महानगरपालिका छ ।
महानगरका १, २, १३, १४, २८ र २९ वडामा ११ जना संक्रमित भएका छन् ।
महानगरबाहिर चन्द्रागिरीमा दुई, कागेश्वरी मनोहरामा तीन र कीर्तिपुर, बूढानिलकष्ठमा एक–एक जनामा हैजा संक्रमण पुष्टि भएको छ ।
त्यस्तै, ललितपुर महानगरपालिकामा दुई र भक्तपुरको चाँगुनारायण नगरपालिकामा एक जनामा संक्रमण पुष्टि भएको छ ।
विभिन्न स्रोतको पानी शुद्धीकरण नगरिकन पिउँदा हैजा संक्रमण फैलिएको महाशाखाले निष्कर्ष निकालेको छ ।
यसअघि, पहिलोपटक हैजा संक्रमित देखिएको बागबजार क्षेत्रका बिरामीले पिउने गरेको धारा र ट्युबेलको पानीमा इकोली जीवाणु भेटिएको थियो । त्यसपछि संक्रमण देखिएका अधिकांश क्षेत्रको पानीमा सो जीवाणु भेटिएको महाशाखाले जनाएको छ ।
काठमाडौंका धारा, ट्युबेल, इनारको पानीमा इकोली भेटिएकाले पानी उमालेर मात्रै पिउन स्वास्थ्य तथा जनसंख्या मन्त्रालयले अनुरोध गरेको छ ।