काठमाडौं : निर्वाचन आयोगले कात्तिकको अन्तिममा प्रतिनिधिसभा र प्रदेशसभा चुनाव गर्नेगरी सरकारलाई प्रस्ताव गर्ने तयारी गरेको छ ।
केही दिनमै प्रधानमन्त्री शेरबहादुर देउवालाई भेटेर चुनावको मिति प्रस्ताव गर्ने कसरतमा आयोग लागेको हो ।
निर्वाचनको १ सय २० दिन अर्थात चार महिना अघि मिति घोषणा हुनुपर्ने आयोगको भनाइ छ ।
आयोगले असार मसान्तभित्र सरकारबाट निर्वाचनको मिति घोषणाको अपेक्षा गरेको छ ।
एक सय ६५ प्रतिनिधि सभा निर्वाचन क्षेत्र र ३ सय ३० वटै प्रदेश सभा निर्वाचन क्षेत्रमा एकै दिन एकै चरणमा चुनाव गर्ने आयोगको तयारी छ ।
एकै चरणमा चुनावको लागि कात्तिक ३० गतेको मिति उपयुक्त हुने आयोगको निष्कर्ष छ ।
दुई चरणमा निर्वाचन गर्दा बढी खर्च हुने भएकाले आयोगले एकै चरणमा गर्नुपर्ने निष्कर्षमा आयोग छ ।
निर्वाचनलाई लक्षित गरेर अहिले आयोगले मतदाता नामावली संकलन गरिरहेको छ । आयोगले केही दिनअघि सुरक्षा निकायका प्रमुखहरुसँग पनि निर्वाचन तयारीबारे छलफल गरिसकेको छ ।
