काठमाडौं : नेकपा माओवादी केन्द्रको केन्द्रीय समितिको बैठकमा सहभागीहरुले नेतृत्वलाई पदाधिकारीको विषय टुंगो लगाउन दबाब दिएका छन् ।
बैठकमा सहभागी नेताहरुले बैठक लम्ब्याएर भए पनि पदाधिकारी टुंगो लगाउनुपर्ने माग राखेका हुन् ।
२०७८ पुसमा माओवादीको महाधिवेशन भएपनि अध्यक्ष पुष्पकमल दाहाल ‘प्रचण्ड’ बाहेक पदाधिकारी चयन हुन सकेका छैनन् ।
आइतबार बसेको केन्द्रीय समिति बैठकमा सहभागी नेताहरुले पदाधिकारी र अरु संरचना टुंग्याउन नेतृत्वको ध्यानाकर्षण गराए ।
स्थानीय तहको निर्वाचनअघि अध्यक्ष दाहालले निर्वाचनपछि पदाधिकारीलगायत अन्य विभागीय प्रमुख चयन हुने बताएपनि विवाद कायमै रहेकाले संघको निर्वाचनपछि यसलाई पुर्याउने सम्भावना रहेको छ ।
चुनावको तयारी गर्न पनि संगठनात्मक संरचनामा हेरफेरको माग पनि नेताहरुले माग गरेका छन् ।
बैठकमा केन्द्रीय सदस्यहरुले गठबन्धन भन्दाभन्दै मतदाताले चुनाव चिह्न नै बिर्सने अवस्था आइसकेको भन्दै पार्टी एक्लै चुनाव लडनुपर्ने माग पनि उठाएका छन् ।