काठमाडौं : काठमाडौं उपत्यकामा वितरण हुँदै आएको खानेपानी सिधै पिउनयोग्य नरहेको भेटिएको छ ।
टयांकर र काठमाडौं उपत्यका खानेपानी लिमिटेड ‘केयुकेएल’ले वितरण गर्दै आएको खानेपानीमा हैजा र झाडापखालाको जीवाणु भेटिएको हो ।
पानीको जार पुनः प्रयोग हुँदा राम्ररी सफा नगरिएका कारण त्यसमा पनि जीवाणु फेला परेको छ ।
जिल्ला स्वास्थ्य कार्यालय काठमाडौंले बागबजार, डिल्लीबजार, बालाजु, त्रिपुरेश्वर, बल्खु, चन्द्रागिरिलगायत ठाउँका पानीको नमुना परीक्षण गर्दा पानी सिधै पिउन योग्य नरहेको भेटिएको जनाएको छ ।
कार्यालयले केयुकेएललाई पानी शुद्ध पार्न प्रयोग गरिने क्लोरिनको मात्रा बढाउन निर्देशन समेत दिएको छ ।
नमुना परीक्षणमा हानिकारक जीवाणु भेटिएपछि स्वास्थ्य कार्यालयले केही दिनदेखि अनुगमनलाई तिव्रता दिएको छ ।
काठमाडौं उपत्यकामा हालसम्म १४ जनालाई हैजा पुष्टि भइसकेको छ । बेलैमा सावधानी नअपनाए अवस्था भयावह बन्ने स्वास्थ्यकर्मीको चेतावनी छ ।
जार तथा बोतलको पानी पनि उमालेर मात्रै पिउन स्वास्थ्यकर्मीले आग्रह गरेका छन् ।
