काठमाडौं : काठमाडौं महानगरमा विगत एक महिनाभन्दा बढी समयदेखि थुप्रिएको फोहोर मंगलबारदेखि उठाउन थालिएको छ ।
सोमबार आन्दोलनरत स्थानीयबासी, नेपाल सरकार सहरी विकास मन्त्रालय र काठमाडौं महानगरपालिकाबीच ११ बुँदे सहमित भएपश्चात विहानवाट फोहोर उठ्न थालेको हो ।
सहरी विकास मन्त्रालयका तर्फबाट सडक, नदी नियन्त्रण, वृक्षारोपण, सामुदायिक भवन निर्माण, जग्गा अधिग्रहण, अस्पताल निर्माणको पहल गर्ने प्रतिबद्धता सरकारले गरेपछि स्थानीयले फोहोर विसर्जन गर्न दिन सहमति जनाएका हुन् ।
त्यस्तै, महानगरपालिकाका तर्फबाट स्वास्थ्य बीमा गरिदिने, पूर्वाधार विकास रकम दिने, फोहोरको गन्ध हटाइदिने, माटोले फोहोर छोप्ने, फोहोरको स्रोत नै वर्गीकरण गराउने लगायत सम्झौतापनि भएको छ ।
फोहोर व्यवस्थापनमा ककनी गाउँपालिका र धुनिबेँशी नगरपालिकाले पनि सहयोग गर्ने भएका छन् ।
सामान्य अवस्थामा काठमाडौं उपत्यकाबाट दैनिक करिब १ हजार ४५ मेट्रिक टन फोहोर उत्पादन हुँदै आएको छ ।
उपत्यकाका दुई महानगरपालिकासहित १८ पालिकाको फोहर नुवाकोटको सिसडोलमा विसर्जन हुँदै आएकोमा अव बञ्चरेडाडामा समेत बिर्सजन गर्न लागिएको छ ।