काठमाडौं : नेकपा (एकीकृत समाजवादी) केन्द्रीय कमिटीको बैठकमा पार्टीका तर्फबाट सरकारमा सहभागी मन्त्रीहरुको कार्यशैलीमाथि प्रश्न उठेको छ ।
बिहीबार काठमाडौंमा जारी समाजवादीको बैठकमा समूहगत छलफलको निष्कर्ष राख्ने क्रममा पार्टीका तर्फबाट सरकारमा सहभागी मन्त्रीहरुको कार्यशैली र आचरणमाथि प्रश्न उठेको हो ।
पार्टीको निर्देशन र आचारसंहिता बिपरित मन्त्रीहरुले काम गर्ने गरेको र पार्टीसँगको तालमेल मिल्न नसकेको लगाएतका प्रश्न उठेको नेता गंगालाल तुलाधरले जानकारी दिए ।
उनले पार्टीभित्र एमसीसीको विवाद सकिएको पनि बताए । बैठकमा निर्वाचनमा प्रतिगामी तत्वहरुलाई प्ररास्त गर्नका लागि गठबन्धनलाई कायमै राखनुपर्ने सुझाव आएको पनि तुलाधरले बताए ।
यसअघि पार्टी अध्यक्ष माधवकुमार नेपालले बुधबार प्रस्तुत गरेको राजनीतिक प्रस्तावमाथि नौ वटा समूह बनाएर केन्द्रीय सदस्यहरुले छलफल गरेका थिए ।
