काठमाडौं : एमसीसीबारे सहमति खोज्न सत्ता साझेदार दलको बैठक बिहीबार बस्दैछ । एमसीसी विधयेक संसदमा टेवुल गर्ने बुधबारको निर्धारित कार्यतालिका स्थगित गरेर प्रधानमन्त्री शेरबहादुर देउवाले बिहीबार दिउँसो तीन बजेका लागि बैठक बोलाएका हुन् ।
बुधबार प्रधानमन्त्री एवं नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालबीच भएको छलफलपछि बिहीबारको बैठक तय गरिएको हो ।
बैठकमा एमसीसी संसदमा टेबुल गर्ने विषयमा सहमतिको खोजी हुनेछ । सहमति नजुटेपनि प्रधानमन्त्री देउवा विधयेक टेबुल गर्ने पक्षमा रहेका छन् ।
माओवादी केन्द्रले भने सरकारले एकलौटी रुपमा विधयेक टेबुल गरे सरकारबाट बाहिरिने बताएको छ ।
सत्तारुढ गठबन्धनमा रहेका कांग्रेस बाहेक सबै दल एमसीसीलाई यथास्थितीमा पास गर्न नहुने पक्षमा रहेकाले आजको बैठकले गठबन्धनको भविष्यसमेत निर्धारण गर्नेछ ।
कानुन, न्याय तथा संसदीय मामिलामन्त्री दिलेन्द्रप्रसाद बडूले शुक्रबारको संसद् बैठकमा एमसीसी टेबल गर्ने बताइसकेका छन् ।
