काठमाडौं : सभामुख अग्निप्रसाद सापकोटाको आह्वानमा सोमबार सर्वदलीय बैठक बस्दैछ ।
प्रधानन्यायाधीश चोलेन्द्रशम्शेर जबराविरुद्ध संसदमा महाभियोग प्रस्ताव दर्ता भएसँगै पछिल्ला राजनीतिक घटनाक्रमको विषयमा छलफलका लागि सभामुख सापकोटाले सर्वदलीय बैठक बोलाएका हुन् ।
दिउसो दुई बजे बस्ने बैठकमा संसदमा प्रतिनिधित्व गर्ने दलका नेतालाई बोलाइएको छ ।
बैठकमा प्रमुख प्रतिपक्ष दल नेकपा एमालेका नेता भने सहभागी नहुने भएको छ । एमाले सभामुखप्रति रुष्ट भएकै कारण उसले बैठक बहिष्कार गर्ने निर्णय गरेको हो । एमाले नेताले सभामुखको राजीनामा समेत माग्दै आएका छन् ।
बैठकमा संसदमा एमसीसी विधयेक संसदमा टेवुल गर्ने विषयमा पनि छलफल हुने बताइएको छ ।
सभामुख सापकोटाले एमसीसीको विषयमा दलहरुको सहमतिअनुसार नै अघि बढ्ने संकेत गरेका छन । प्रतिनिधि सभा बैठक बुधबारका लागि बोलाइएको छ ।
