काठमाडौं : पुनःस्थापित प्रतिनिधिसभाको तेस्रो बैठक आज दिउसो बस्दैछ । संसद भवन नयाँ वानेश्वरमा दिउसो एक बजेका लागि बैठक बोलाइएको छ ।
आजको बैठकमा पनि सरकारका तर्फबाट विभिन्न अध्यादेश पेश नहुने भएपछि बैठक विजनेश विहीन हुने देखिएको छ ।
आजको बैठकमा बैठकको अध्यक्षता गर्ने सदस्यहरुको मनोनयन गर्ने र संविधानसभाका सदस्य दिनेशचन्द्र यादवको मृत्यु भएकोमा शोक प्रस्ताव पारित गर्ने सम्भावित कार्यसूची राखिएको छ ।
अधिवेशन शुरु भएको पहिलो बैठकमै अध्यादेश पेश गर्नुपर्ने भए पनि प्रतिनिधिसभाको तेस्रो बैठकमा समेत सातवटा अध्यादेश पेश नहुने भएको छ । सोमबार बसेको कार्य व्यवस्था समितिको बैठक बिना निष्कर्ष सकिएपछि सरकारले पेश गर्ने विभिन्न अध्यादेश अन्योलमा परेका हुन् ।
कार्य व्यवस्था परामर्श समतितिको बैठकमा कानुन मन्त्री लीला श्रेष्ठ नै अध्यादेश पेश गर्न तयार नभएको अन्य दलले आरोप लगाएका छन् ।
उनले प्रधानमन्त्रीसँग छलफल गर्नुपर्ने बताएपछि कार्यव्यवस्था परामर्श समिति बैठकमा सहमति जुट्न नसकेको हो । संसद नचलेको अवस्थामा सरकारले जारी गरेका आठवटा अध्यादेश बैठकमा पेश गर्नुपर्ने कार्यसुची छ ।
