काठमाण्डौ – सत्तारुढ नेपाल कम्युनिस्ट पार्टी (नेकपा) भित्रको जारी विवाद अन्त्य हुने दिशातिर मोडिएको छ । बिहीबार र शुक्रबार अध्यक्षद्वय प्रधानमन्त्री केपी शर्मा ओली र पुष्पकमल दाहाल ‘प्रचण्ड’बीच भएको वार्तापछि सहमतिको मौखिक खाका तयार भएको छ ।
अध्यक्षद्वयबीच भएको मौखिक सहमतिलाई मूर्त रूप दिन लिखित खाका बनाउने कार्यादेशसहित महासचिव विष्णु पौडेलको संयोजकत्वमा ६ सदस्यीय कार्यदल गठन भएको छ । अध्यक्षद्वयले कार्यदल गठन गरेका हुन् ।
कार्यदलमा ओली, प्रचण्ड र वरिष्ठ नेता माधवकुमार नेपाल पक्षीय दोस्रो तहका नेता छन् । ओली पक्षबाट महासचिव पौडेल र शंकर पोखरेल, प्रचण्ड पक्षबाट जनार्दन शर्मा र पम्फा भुसाल तथा नेपाल पक्षबाट सुरेन्द्र पाण्डे र पछिल्लो समय कतै नलागेका नेता भीम रावल कार्यदलमा छन् । त्रिपक्षीय कार्यदलले बनाएको मस्यौदा नै नेकपा विवादको अन्त्य गर्ने खाका बन्ने नेकपा उच्च स्रोतले जनाएको छ ।
अध्यक्षद्वय ओली–प्रचण्डबीच भएको मौखिक सहमतिमा आगामी चैतमा पार्टी एकता महाधिवेशन गर्ने विषय मुख्य रहेको छ । महाधिवेशनको दिशातर्फ अगाडि बढ्न नै नेकपा शीर्ष नेताहरू सहमतिको बिन्दुमा आएका छन् । यसअघि उपाध्यक्ष वामदेव गौतमले गरेको ६ बुँदे प्रस्तावकै सेरोफेरोमा अध्यक्षद्वयबीच सहमति भएको छ ।
प्रधानमन्त्री ओली ५ वर्ष नै प्रधानमन्त्री रहने, महाधिवेशनसम्म प्रचण्डले पार्टीका काम कार्यकारी अधिकारसहित सम्हाल्ने, महाधिवेशनपछि ओलीले पार्टी अध्यक्ष छाड्ने, वैचारिक विषय सहमतिमा टुंग्याउने मौखिक सहमति दुवै अध्यक्षबीच भएको स्रोतले जनाएको छ ।
सरकारका कामलाई प्रभावकारी बनाउन मन्त्रिमण्डल पुनर्गठन गर्ने, सरकार सञ्चालनका लागि सचिवालय बैठकबाट प्रधानमन्त्रीले परामर्श गर्ने र सुझाव लिने शर्त समेत सहमतिमा समावेश रहेको जनाइएको छ । मन्त्रिमण्डल पुनर्गठन गर्दा सरकारमा २ वर्ष पूरा गरिसकेका सबैलाई बिदा गर्ने र नयाँलाई जिम्मेवारी दिने सहमति समेत भएको स्रोतले जनाएको छ ।
संवैधानिक नियुक्ति, राजदूत र अन्य राजनीतिक नियुक्ति गर्नुअघि सचिवालय बैठकमा परामर्श गर्नुपर्ने शर्तलाई प्रधानमन्त्री ओलीले मान्नुपर्ने सहमति भएको छ । यसरी भएका पार्टीका कामलाई पार्टीले सहयोग, समर्थन, पक्षपोषण गर्नुपर्ने, पार्टी घोषणापत्रमा लेखिएका कुराहरूलाई सरकारको नीति तथा कार्यक्रममा समावेश गर्नुपर्ने, पार्टीलाई विधि पद्धतिमा चलाउने सहमति समेत भएको छ ।
त्रिपक्षीय कार्यदलले आगामी २ दिनभित्र लिखित सुझाव दिएपछि सहमतिको खाका स्थायी कमिटी बैठकबाट अनुमोदन गरिने समेत स्रोतले जनाएको छ । कार्यदलको सिफारिसका आधारमा स्थायी कमिटी बैठक बस्नेछ । कोरोना भाइरस संक्रमण रोकथामका लागि पार्टी र सरकार प्रभावकारी रूपमा सक्रिय हुने विषयमा समेत अध्यक्षद्वयबीच छलफल भएको छ ।
प्रधानमन्त्री ओलीले पार्टीलाई बेवास्ता गर्दै एकलौटी रूपमा सरकार सञ्चालन गरेको आरोप लगाउँदै अध्यक्ष प्रचण्ड, नेता नेपाल लगायत शीर्ष नेताले राजीनामाको माग गरेपछि नेकपामा विवाद चर्किएको थियो । विवादकै बीच नेकपा स्थायी कमिटी बैठक अनिश्चितकालका लागि स्थगित भएको थियो । अन्तिम बैठकले अध्यक्ष ओलीसँग वार्ता गरेर सहमति खोज्ने जिम्मा अध्यक्ष प्रचण्डलाई दिएको थियो ।
