डेनमार्कका नेपाली ब्यबसायीहरु द्वारा नबनियुक्त राजदुत तुलाधरलाई स्वागत,

डेनमार्कका लागि नवनियुक्त राजदुत सुम्निता तुलाधारलाई नेपाली ब्यबसायी संघ ( नेप्लीज बिजनेस एसोसिएसन ) डेनमार्कले स्वागत तथा सम्मान गरेकोछ ।

राजदुतावासमा आयोजित स्वागत कार्यक्रममा राजदुत तुलाधारले नेपाली ब्यबसायीका दुःख सुख र आइपर्ने समस्या समाधानमा दुतावास सदैव अबिभाबकिय भूमिकामा रहनेछ भन्नु भयो । राजदूत तुलाधरले आफ्नो विगतका कार्य अनुभवहरू साझा गर्दै डेनमार्कमा नेपाली व्यवसाय प्रबर्धनका लागि आफ्नो व्यक्तिगत तथा दूतावासको तर्फबाट पूर्ण सहयोग रहने कुरामा जोड दिनुभयो ।

उहाले ३७ वर्षदेखि महिला अधिकार, सामाजिक तथा लैङ्गिक न्यायका क्षेत्रमा कार्यरत रहेको बताउँदै, डेनमार्कमा पनि यि बिषयमा कूटनीतिक पहल गर्ने प्रतिबद्धता व्यक्त गर्नुभयो ।

सो कार्यक्रममा संस्थाका अध्यक्ष मिलन टि. श्रेष्ठले नेप्लिज बिजनेस एसोसिएसन डेनमार्कको स्थापना, उद्देश्य तथा भाबि कार्ययोजना बारे जानकारी गराउँदै नेपाली व्यवसायीहरू र नेपाली राजदूतावास बिच सहकार्यको सम्भावनाहरू बारेमा प्रकाश पार्नु भयो ।

लामो समयदेखि डेनमार्कमा व्यवसाय सञ्चालन गरिरहेका नेपाली उद्यमी तथा उच्च शिक्षा अध्ययनका लागि आएका नेपाली विद्यार्थीहरूले आर्जन गरेको ज्ञान, सीप तथा पूँजीलाई व्यवसायिक रूपमा विकास गरी नेपाल र नेपालीलाई डेनमार्कको बजारमा स्थापित गराउने संस्थाको लक्ष रहेको श्रेष्ठले जानकारी गराउनु भयो ।

संस्थाका लेखा निरीक्षक नविन राज पौडेलले नेपाली व्यवसायीहरूबीच आपसी सहकार्यको महत्त्व उजागर गर्दै नेपाल राजदूतावाससँग सहकार्य गरेर अगाडि बढ्ने प्रतिबद्धता ब्यक्त गर्नु भयो ।

सदस्य बुद्धि सापकोटाले नेपाली व्यवसायीहरूलाई एक आपसमा जोड्ने तथा व्यवसायिक अनुभव आदान–प्रदान गर्न सहज वातावरण सिर्जना गर्न संस्था कृयाशिल रहेकोछ भन्नु भयो ।

संस्थाका कोषाध्यक्ष कुलराज शर्माले डेनमार्कमा नेपाली व्यवसायीहरूको पहिचान मजबुत बनाउन र नेपाल–डेनमार्कबीच व्यापारिक सम्बन्ध सुदृढ गर्न राजदूतावाससँग सहकार्य गर्नु अपरिहार्य हुने बताउनुभयो ।

कार्यक्रममा राजदूत तुलाधर, संस्थाका अध्यक्ष मिलन टि. श्रेष्ठ, कोषाध्यक्ष कुलराज शर्मा, लेखा निरीक्षक नविन राज पौडेल, बुद्धि सापकोटा , गौरभ महर्जन, श्रीया महर्जन, विकास मैनाली लगायतले नेपाली व्यवसाय बिस्तार र नेपालको प्रबर्धनका सम्भावना, अवसर र चुनौतीबारे व्यापक छलफल गरेका थिए।

नेप्लिज बिजनेस एसोसिएसन डेनमार्कले डेनमार्कस्थित नेपाली व्यवसायीहरूलाई एकसाथ ल्याई व्यापारिक सञ्जाल विस्तार गर्ने, अनुभव आदान–प्रदान गर्ने, पारस्परिक सहयोग अभिवृद्धि गर्ने तथा नेपाल र नेपाली उत्पादनलाई डेनमार्कको बजारमा प्रबर्धन गर्न कृयाशिल रहेको र भविष्यमा पनि नेपाली राजदूतावास सँग सहकार्य गरेर नेपाली व्यवसायीहरूको हक हित ब्यवसाय प्रबर्धनमा योगदान दिने प्रतिबद्धतासहित कार्यक्रम समापन भएको थियो।