लन्डन । बेलायतको हल विश्वविद्यालयमा प्रा सूर्य प्रसाद सुवेदीको नाममा स्थापित आधुनिक दासता सम्बन्धि अन्तरराष्ट्रिय पुरस्कार विजेता घोषणा गरिएको छ।
यस वर्षको पुरस्कार अक्सफोर्ड विश्वविद्यालयमा अन्तरराष्ट्रिय मानव अधिकार कानूनमा स्नातकोत्तर गरिरहेका योगी ब्रतजयालाई उनको वातावरण परिवर्तन सम्बन्धि नीति र कानूनले आदिवासी जनजातिहरुको हजारौं वर्षदेखिको भूमिमाथिको अधिकारमा परेको असरबारेको निबन्धका लागि प्रदान गरिएको हो।
आधुनिक प्रकारका दासता उन्मूलन र मानवको मानव भएर बाँच्न पाउने अधिकारको संरक्षण सम्बन्धि विषयमा संसारको कुनै पनि राष्ट्रमा भएका मेधावी व्यक्तिले लेखेको सर्वोत्कृष्ट आलेखलाई प्रदान गरिने उक्त पुरस्कार प्रत्येक वर्ष प्रदान गरिने व्यवस्था छ।
करिव दुई सय वर्ष पहिले संसारभरी दासप्रथा उन्मूलन गर्न नेतृत्व गरेका बेलायतका एक राष्ट्रिय व्यक्तित्व विलिएम विल्बर्फोर्सको नाममा उक्त विश्वविद्यालयमा स्थापना गरिएको विल्बर्फोर्स इन्सटिच्युटले उक्त पुरस्कार प्रदान गरेको हो ।
सो पुरस्कार कानून, राजनीति शास्त्र, समाजशास्त्र, मानविकी आदि विषयमा संसारको कुनैपनि विश्वविद्यालयबाट स्नातक गरेका तर चालिस वर्ष ननाघेका व्यक्तिले मात्र सहभागिता जनाउन पाउने गरि स्थापना गरिएको हो।
उक्त विश्वविद्यालयबाट सन् १९८८ मा विशिष्ट श्रेणीमा प्रथम भइ कानूनमा स्नातकोत्तर गरेका प्रा सुवेदीलाई तीन वर्षअघि उक्त विश्वविद्यालयले मानार्थ महाविद्यावारिधि जस्तो उच्च उपाधि प्रदान गरेको थियो।
