काठमाडौं : प्रधानमन्त्री पुष्पकमल दाहाल प्रचण्डले तत्काललाई मोबाइल डिभाइस म्यानेजमेन्ट सिस्टम एमडीएमएस लागू नगर्न निर्देशन दिएका छन् ।
आजदेखि लागू गर्ने भनिएको एमडीएमएस लागू नगर्न प्रधानमन्त्री दाहालले निर्देशन दिएका हुन् ।
भन्सार विभाग र नेपाल दूरसञ्चार प्राधिकरणलाई प्रधानमन्त्रीले अहिलेलाई लागू नगर्न निर्देशन दिएपछि हाललाई योजना स्थगित हुने भएको छ ।
नेपाल दूरसञ्चार प्राधिकरणले आजदेखि यो प्रणाली सञ्चालनमा ल्याउने भन्दै मोबाइल अनिवार्य दर्ता गर्न सूचना जारी गरेको थियो ।
मोबाइल दर्ता गर्नुपर्ने व्यवस्थाले विदेशबाट फर्कने नागरिकले थप सास्ती पाउने भन्दै यसको चर्को आलोचना हुँदै आएको थियो ।
सरकारले विदेशबाट फर्कने नेपालीले एकथान मोबाइल ल्याउँदा पनि १८ प्रतिशत कर लिन लागेपनि वैदेशिक रोजगारीमा रहेका नेपालीले त्यसको विरोध गर्दै आएका छन् ।
त्यसको विरोधमा सामाजिक सञ्जालमा ‘नो रेमिट्यान्स’ ह्यासट्याग अभियान समेत शुरु भएको थियो ।
अनधिकृतरूपमा आयात हुने मोबाइल फोनको वितरण तथा प्रयोगलाई निरुत्साहित गर्ने भन्दै भन्दै एमडीएमए प्रणालीलाई पूर्णरूपमा कार्यान्वयनमा ल्याउने निर्णय गरेको थियो ।
