दार्चुलामा बाढी पहिरोपछि थुनिएको महाकाली नदीमा पानी बग्न थालेको छ । शुक्रवार रातिको पानीले महाकाली नदी थुनिएर बनेको ताल बग्न थालेपछि जोखिम केही घटेको छ ।
लास्कु जलाधारमा ठूलो पानी परेपछि खसेको पहिरोले नदी थुनिएपछि जोखिम बढेको थियो । बाढीले दुहुँ र महाकाली नगरपालिका जोड्ने पक्की पुल बाढीले बगाएको छ ।
महाकालीका चालिस भन्दा धेरै घर जोखिममा रहेका छन् । महाकाली–३ मा रहेको दशरथ आधारभूत विद्यालयसमेत बगाएको छ ।
बाढीले महाकाली–३ मा रहेको डुङ्ग्री विद्युत् पावर हाउसमा पनि पूर्णरुपले क्षति पुर्याएको छ । सदरमुकाम खलङ्गामा खानेपानीको अभाव भएको छ ।
लास्कु खोलामा आएको बाढीले एउटा झोलुङ्गे पुलपनि बगाएको छ । बाढीपछि दुहुँ र व्यास क्षेत्रबाट सदरमुकाम खलङ्गा आउने–जाने बाटो बन्द भएको छ ।
बाढी/पहिरोमा परी पाँच जनाको मृत्यु भएको प्रहरीले जनाएको छ ।
मृत्यु हुनेमा महाकाली नगरपालिका–२ मुल्लाका ७७ वर्षीय नन्दराम बोहरा र महाकाली–३ डुङरीकी ३५ वर्षीया मानमती कार्की तथा नौगाड गाउँपालिका–१ की ३२ वर्षीया जानकी ठगुन्ना र १५ वर्षीया धनुली ठगुन्ना तथा नौगाड–२ का ६८ वर्षीय मोहनराम पार्की छन् ।
बाढीमा बेपत्ता भएका १० जनाको अवस्था अझै अज्ञात छ । लास्कु र डुङरीका १० जना बेपत्ता भएका हुन् ।
बेपत्ताको नेपाल प्रहरी, सशस्त्र प्रहरी, नेपाली सेना र स्थानीयवासीले खोजी गरिरहेका छन् ।
घटनामा घाइते भएका आठ जनाको जिल्ला अस्पतालमा उपचार जारी छ ।
बाढी/पहिरो प्रभावित क्षेत्रमा राहत सामग्री बोकेर सेनाको हेलिकप्टर गएको छ ।
उद्योग तथा वाणिज्यमन्त्री दीलेन्द्रप्रसाद बडु, सुदूरपश्चिम प्रदेशका आन्तरिक मामिला तथा कानूनमन्त्री रणबहादुर रावल, सुदूरपश्चिम प्रदेशका वन वातावरण उद्योग तथा पर्यटनमन्त्री मानबहादुर धामीसहितको टोली पनि सदरमुकाम खलङ्गा पुगेको छ ।
