काठमाडौं : बेपत्ता पारिएका व्यक्तिको छानविन, सत्य निरुपण तथा मेलमिलाप आयोग तेश्रो संशोधन विधेयक २०७९ प्रतिनिधिसभामा टेबुल गरिएको छ ।
आज बसेको बैठकमा कानून, न्याय तथा संसदीय मामिलामन्त्री गोविन्द प्रसाद शर्मा कोइरालाले सो बिधेयक टेबुल गरेका हुन् ।
विधेयक प्रस्तुत गर्दै कानुनमन्त्री कोइरालाले माओवादीको सशस्त्र द्वन्द्वका क्रममा मारिएका परिवार र घाइतेलाई राहत प्रदान गर्नका साथै समाजमा मेलमिलाप कायम गर्न ल्याइएको बिधेयकलाई सरकारले अघि बढाउन लागेको जानकारी दिए ।
मन्त्री कोइरालाले द्वन्दपीडितलाई प्राथमिकतामा राखेर कानून बनाउन बिभिन्न सुझावहरु प्राप्त भएकाले आवश्यक सुझावहरुलाई समावेश गरेर संशोधन गर्न बिधेयक तयार गरिएको बताए ।
उनले संक्रमणकालीन न्यायलाई तार्किक निष्कर्षमा पुराउनका लागि बिधेयकलाई सदनमा पेश गरिएको बताए ।
साथसाथै सशस्त्र द्वन्द्वलाई संविधानले समेत स्वीकार गरिसकेको पनि कानुनमन्त्री कोइरालाले बताए ।
त्यसअघि उक्त प्रस्ताव प्रस्तुत गर्न अनुमति माग्ने प्रस्तावमाथि प्रेम सुवालले गर्नुभएको विरोधको सुचनालाई बैठकले बहुमतले अस्वीकृत गरेको थियो ।
प्रतिनिधिसभाको अर्को बैठक भाद्र १३ गते बोलाइएको छ ।
प्रमुख प्रतिपक्ष एमालेले पार्टीको आन्तरिक छलफललाई कारण देखाउदै एक साता संसद बैठक स्थगित गर्न आग्रह गरेको थियो ।
सोही अनुसार अर्को बैठक एक सातापछिका लागि बोलाइएको हो ।
