काठमाडौं : निवर्तमान अर्थमन्त्री जनार्दन शर्माले पदमा रहँदा आफूले कुनै गलत काम नगरेको दाबी गरेका छन् ।
बिहीबार बिहान संसदीय छानविन समिति विशेष समितिमा बयान दिँदै उनले आफूविरुद्ध लागेका सबै आरोप झुटो भएको दाबी गरेका हुन् ।
समितिसँगको छलफलमा निवर्तमान अर्थमन्त्री शर्माले आफूले करका दर हेरफेरमा अनधिकृत व्यक्ति संलग्न गराएको तथा सीसीटीभी फुटेज डिलिट गरेको भन्ने आरोप गलत भएको बताए ।
निवर्तमान अर्थमन्त्री शर्माले सीसीटीभी फुटेजको बारेमा आफूलाई थाहा नभएको दाबी गरे । उनले त्यहाँ सुरक्षाकर्मी र अरू मर्यादापलकहरू पनि हुने हुँदा बाहिरको मान्छे पस्ने कुनै सम्भावना नभएको उनको भनाइ छ ।
त्यस्तै बाहिरको मान्छे पसेको सजिलै थाहा हुने उनको भनाइ छ । उनले सीसीटीभी फुटेज कहिलेसम्म रहन्छ भन्ने मन्त्रीलाई जानकारी नहुने पनि बताए ।
शर्माले बजेट निर्माणमा मन्त्रालयका अधिकारीहरुबाहेक अन्य असम्बन्धित व्यक्ति कोही पनि संलग्न नभएको समितिलाई बताए । स्थापित मूल्य, मान्यता, विधि, पद्धतिका आधारमा बजेट निर्माण गरिएको उनको भनाइ छ ।
बजेटमा चलखेलको आरोप लागेर संसदीय समिति गठन भएपछि शर्माले अर्थमन्त्री पदबाट राजीनामा दिएका थिए ।
प्रतिनिधि सभाले असार २२ गते ११ सदस्यीय छानविन समिति गठन गरेको थियो । समितिले अहिले बजेट निर्माणमा असबन्धित मानिस सग्लन रहेको विषयमा सरोकारवालासँग छलफल गरिरहेको छ । सोही क्रममा पूर्व अर्थमन्त्री शर्मासँग बयान लिएको हो ।
निवर्तमान अर्थमन्त्री शर्माले २०७९/०८० को बजेट बनाउने क्रममा अनाधिकृत व्यक्तिलाई मध्यरातमा अर्थ मन्त्रालय बोलाएर करका दर हेरफेर गरेको आरोप लागेको छ ।
