काठमाडौं : प्रहरीको केन्द्रीय अनुसन्धान ब्युरो सीआईबीले बालुवाटारस्थित ललिता निवास परिसरको सरकारी जग्गा हिनामिनामा सम्बन्धी अनुसन्धान प्रतिवेदन आज जिल्ला सरकारी वकिलको कार्यालय काठमाडौंमा बुझाएको छ ।
पाँच पूर्व सचिवसहित करिब साढे ३ सय ६० जनालाई प्रतिवादी बनाएर मुलकी अपराध संहिता बमोजिम कारबाहीको माग गर्दै सीआईबीले रायसहितको प्रतिवेदन सरकारी वकिलको कार्यालयमा बुझाएको हो ।
सीआईबीले पूर्वसचिवहरु दीप बस्नेत, छविराज पन्त, युवराज भुसाल, नारायणगोपाल मलेगो र दिनेशहरि अधिकारी, भूमाफिया किटान गरिएका रामकुमार सुवेदी र शोभाकान्त ढकाल तथा व्यापारी मिनबहादुर गुरुङलगायतलाई प्रतिवादी बनाएको छ ।
सरकारी वकिलको कार्यालयले प्रहरीले बुझाएको प्रतिवेदन अध्ययनको क्रममा रहेको जनाएको छ । विभिन्न मितिमा किर्ते कागजात र जालसाजी तथा कर्मचारीलाई प्रलोभनमा पारेर ललिता निवासको जग्गा भूमाफिया र तत्कालीन भोगाधिकारीले हडपेका थिए ।
सीआईबीले दुई वर्ष लामो अनुसन्धान र यसअघिको एकवर्ष लामो छानबिनका आधारमा खुलेका तथ्य र प्रमाण बमोजिम ३ सय ६० जना भन्दा बढीलाई प्रतिवादी बनाएको छ ।
प्रतिवादीलाई बढीलाई बिगो कैद जरिवाना गर्नुपर्ने रायसहित प्रतिवेदन सरकारी वकिलको कार्यालयमा बुझाएको प्रहरीले जनाएको छ ।
अख्तियारले भने १ सय ७५ विरुद्ध कारबाही तथा जग्गा फिर्ताको माग दाबीसहित यसअघि नै उच्च अदालमा मुद्दा दर्ता गरेको छ ।
बालुवाटारको १४३ रोपनी ६ आना ३ पैसा ३ दाम जग्गा हडपिएको प्रहरी प्रतिवेदनमा उल्लेख छ । अहिले यो जग्गाको न्यूनतम मूल्य १३ अर्ब ७६ करोडभन्दा बढी हुने बताइएको छ ।
