काठमाडौं : जनता समाजवादी पार्टी जसपाले अध्यक्ष महन्थ ठाकुरसहित आफ्ना ४ जना नेतालाई पार्टीबाट निष्काशित गरेको छ ।
नेता मोहमद इस्तियाक राईका अनुसार सोमबारको पार्टीको कार्यकारीणी समितिको बहुमत सदस्यको बैठकले महन्थ ठाकुर, राजेन्द्र महतो, लक्ष्मणलाल कर्ण र सर्वेन्द्रनाथ शुक्लालाई पार्टीबाट निष्काशन गरेको हो ।
यसबारे मंगलबार निर्वाचन आयोजमा जानकारी समेत गराइसकेको नेता राईले बताए । योसँगै वर्तमान सरकारमा सहभागि हुने या नहुने विषयलाई लिएर दुई धार देखिएको जसपा विभाजनको संघारमा पुगेको छ । जसपाले पाँच दिन अघि ती नेताहरुलाई स्पष्टीकरण सोधेको थियो ।
पार्टी नीति विपरीत काम गरेको आरोप लगाउँदै उपेन्द्र यादव समूहले उनीहरुलाई स्पष्टीकरण सोधेको थियो । ठाकुर समूहले पनि यादव समूहलाई अनुशासन उल्लंघनको आरोप लगाउँदै यादवलाई स्पष्टीकरण सोधेको थियो ।
यादव समूहले पार्टीको नीतिविपरीत केपी ओली सरकारलाई साथ दिनुका साथै राष्ट्रपति कार्यालय, निर्वाचन आयोगलगायतलाई पत्र पठाएको आरोप लगाएको छ ।
यादव समूह हाल संसद विघटनको विरुद्धमा उत्रिदै विपक्षी नेपाली काँग्रेसलगायतका दलको गठबन्धनलाई साथ दिएको छ ।
तर ठाकुर समूहले ओलीले संसद विघटन गर्दै घोषणा गरेको निर्वाचनकालाई स्वागत गरेको छ । यादव समूहको आफूहरुलाई पार्टीबाट निस्कासन गर्ने निर्णयलाई ठाकुर समूहले कसरी लिन्छ त्यसबारे स्पष्ट भइसकेको छैन ।
