काठमाडौं : राष्ट्रपति विद्यादेवी भण्डारीको बङ्गलादेश भ्रमणका क्रममा जलविद्युत, कृषि लगायतका विषयमा सम्झौता हुने भएको छ ।
राष्ट्रपति भण्डारीको आजदेखि हुने दुई दिने भ्रमणको समयमा पर्यटन र संस्कृति आदानप्रदानसँग सम्बन्धित केही विषय, जलविद्युत, पशुपंक्षी र बालीनालीमा प्रयोग हुने विषादी तथा बन्दरगाह, रेलवे र नेपाल–बङ्गलादेश यातायात सञ्चालन लगायतका विषयमा सम्झौता पत्रमा हस्ताक्षर हुने भएको हो ।
यस्तै बङ्गलादेशले नेपालबाट बिजुली किन्न गरिरहेको पहलका विषयमा पनि राष्ट्रपति भण्डारीको भ्रमणका सिलसिलामा छलफल हुने सरकारको भनाइ छ ।
राष्ट्रपति भण्डारी आज बङ्गलादेश प्रस्थान गर्ने कार्यक्रम रहेको छ । राष्ट्रपति भण्डारीका लागि नेपाल वायु सेवा निगमको न्यारो बडी ए ३२० जहाज चार्टर गरिएको छ ।
काठमाडौँ बङ्गलादेश उडान अनुमानित एक घण्टा १० मिनेटको हुनेछ । राष्ट्रपति भण्डारी चैत १० गते बङ्गलादेशी समयानुसार अपराह्न ३ः४५ बजे काठमाडौँ फर्कने उडान तालिका छ ।
