काठमाण्डौ – नेपालमा पछिल्लो २४ घण्टामा थप ४ सय ६४ जनामा कोरोना भाइरस संक्रमण पुष्टि भएको छ । पछिल्लो २४ घण्टामा ५ जना कोरोना संक्रमितको मृत्यु हुँदा कूल संख्या ७० पुगेको छ । हिजो पनि ५ जना मृतक थपिएका थिए ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले नेपालमा कुल संक्रमितको संख्या २२ हजार ३ सय ६४ पुगेको जानकारी दिए । सक्रिय संक्रमितको संख्या ६ हजार ३ सय ३० पुगेको छ । पछिल्लो २४ घण्टामा देशभर ७ हजार ९ सय २६ जनाको पीसीआर परीक्षण गरिएको थियो ।
त्यस्तै पछिल्लो २४ घण्टामा ४ सय ३७ जना संक्रमित निको भएका छन् भने अहिलेसम्म नेपालमा १५ हजार ८ सय १४ जना कोरोना संक्रमित उपचारपछि निको भएर घर फर्केका छन् ।
