काठमाडौं : नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले अहिलेको निर्वाचन प्रणालीले गणतन्त्र र देशलाई नै खतरामा पारेको बताएका छन् ।
नेकपाका संस्थापक नरबहादुर कर्माचार्यको नवौँ स्मृति दिवसको अवसरमा आयोजित कार्यक्रममा उनले पैसा खर्च नगरी चुनाव जित्ने अवस्था नरहेको यो प्रणालीले देशलाई भड्खालोमा लैजाने तर्क गरेका हुन् ।
गाउँपालिकाको अध्यक्षमा चुनाव जित्न १० करोड रुपैयाँसम्म खर्च भएकोसुनेको भन्दै अध्यक्ष दाहालले यो अवस्था रहेसम्म देशको अवस्था सुधार नहुने बताए ।
अध्यक्ष दाहालले देशमा संघीय लोकतान्त्रिक गणतन्त्र भए पनि यो निर्वाचन प्रणालीका कारण जनताले अनुभूति गर्न नपाएको दाबी गरे ।
सांसद नभई मन्त्री, प्रधानमन्त्री हुन नपाइने व्यवस्थाले करोडौँ खर्च गरेर सांसद हुन खोज्ने प्रवृति बढेको उनको भनाइ छ ।
पैसा खर्च गरेर पदमा पुगेपछि लगानी असुल्ने प्रवृत्तिले मुलुकमा भ्रष्टाचार मौलाएको दाहालले बताए ।
अध्यक्ष दाहालले निर्वाचनमा दलाल पुँजीपतिहरु पैसा खर्च गरेर आइरहेको भन्दै संघर्ष गर्नुपर्नेपनि बताए । उनले श्रमजीवि जनता र क्रान्तिकारीहरुले चुनाव लडेर जितेर आउने कुरा सपना झैँ भएको गुनासो गरे ।
अध्यक्ष दाहालले परिवर्तन स्थापित गर्न, संविधान सभाबाट संविधान बनाउन र यसलाई कार्यान्वयन गर्न मुख्य भुमिका खेल्न पार्टी, नेतृत्व, विचार र प्रवृति हाबी नभएसम्म देशले सुख नपाउने बताए ।
पार्टीभित्र र कम्युनिष्ट आन्दोलनमा धेरै विचलन, विकृति, विसंगति देखापरेको गुनासो उनको थियो ।
