काठमाडौं : नेपाली कांग्रेसको आसन्न १४औँ महाधिवेशनअन्तर्गत काठमाडौँ जिल्ला कार्यसमितिको सभापतिमा सबुज बानियाँ विजयी भएका छन् ।
प्रतिद्वन्द्वी उपेन्द्र कार्कीलाई ८ सय ६८ मत अन्तरले पराजित गर्दै बानिया दोस्रो कार्यकालका लागि सभापतिमा निर्वाचित भएका हुन् ।
निर्वाचित अध्यक्ष बानियाँले १ हजार ९ सय ५७ मत पाएका छन । कार्कीले एक हजार ८९ मत पाएका छन् ।
निर्वाचित बानियाँ प्रकाशमान सिंह र गगन थापा समूहबाट उम्मेदवार बनेका थिए । कार्कीलाई सभापति शेरबहादुर देउवा र पूर्वमहामन्त्री कृष्णप्रसाद सिटौलानिकट भीमसेनदास प्रधानको समर्थन थियो ।
उपसभापतिमा राजकुमार नकर्मी र गोकर्ण केसी निर्वाचित भए भने सचिवमा इन्द्रबहादुर थापा र गोविन्द पुडासैनी निर्वाचित भएका छन् ।
त्यस्तै नेपाली कांग्रेस काठमाडौँ सहसचिवमा रोमेल श्रेष्ठ र अमिता प्रधान निर्वाचित भएका छन् । काठमाडौँमा जिल्ला सभापतिका लागि आइतबार मतदान भएको थियो ।
