देशको आर्थिक क्षेत्रका सूचकहरु सकारात्मक : अर्थमन्त्री पौडेल

काठमाडौं : अर्थमन्त्री विष्णु प्रसाद पौडेलले देशको आर्थिक क्षेत्रका सूचकहरु सकारात्मक रहेको बताएका छन् । बुधबार कृषि विकास बैंक लिमिटेडको वार्षिकोत्सवको अवसरमा सम्बोधन गर्दै अर्थमन्त्री पौडेलले देशको आर्थिक क्षेत्रको सूचकहरु सकारात्मक रहेको बताएका हुन् ।

कोभिड-१९ को कारणले राजस्व परिचालनका केही सन्दर्भमा प्रतिकुलता रहेपनि अन्य क्षेत्रमा आर्थिक सूचकहरु सकारात्मक रहेको उनको भनाइ छ । मन्त्री पौडेलले कोभिड १९ को बावजुद पनि देशको अर्थतन्त्रलाई गतिशिल, चलायमान र उत्पादनशील बनाउन प्रयत्नरत रहेको बताए । उनले छिटोभन्दा छिटो कोभिडविरुद्दको भ्याक्सिन आयात गरेर आम नागरिकलाई निशुल्क उपलब्ध गराउने जानकारी पनि दिए ।

फरक प्रसंगमा मन्त्री पौडेलले मध्यावधि निर्वाचन गर्ने विषय संविधान कार्यान्वयनकै खुड्किलो भएकोले मुलुकलाई गतिशिल ढंगले अघि बढाउन मद्दत गर्ने बताए । मुलुकलाई संविधानले परिलक्षित गरेको दिशामा लैजानको निम्ति निर्वाचन अपरिहार्य रहेको उनको भनाइ छ ।

कार्यक्रममा नेपाल राष्ट्र बैंकका गर्भनर महाप्रसाद अधिकारीले नेपाल सरकारले डिजिटल फ्रेमवर्क लागु गरेको र वित्तिय क्षेत्रलाई यसले विशेष रुपले समेट्ने भएकाले बढीभन्दा बढी विद्युतिय कारोबारको दिशामा राष्ट्र बैंक अघि बढेको बताए ।

कृषिमा आधुनिकिकरण गर्ने धेरै सम्भावना मुलुकमा भएकाले कृषि विकास बैंकले अन्य क्षेत्रमा भन्दा विशेषगरी कृषि क्षेत्रमै लगानी गर्नुपर्ने उनले सुझावसमेत दिए ।

कृषि विकास बैंकका अध्यक्ष लक्ष्मी प्रपन्न निरौलाले बैंकले आगामी दिनमा उच्चमुल्य प्राप्त हुने फलफुलमा कर्जा बिस्तार गर्ने जानकारी दिए । यसैगरी गाई भैंसी फार्ममा पनि लगानी बिस्तार गर्ने योजना रहेको उनको भनाई छ । बैंकले उत्पादन र उत्पादकत्व बढाउनेतर्फ काम गर्ने उनले बताए । कृषि विकास बैंक लिमिटेडले बुधबार ५४ औँ वार्षिकोत्सव मनाएको हो ।