‘न्यायाधीश र वकिल अडियो प्रकरणले न्यायपालिकाको अवस्था उजागर’

काठमाडौं : न्यायाधीश र अधिवक्ताबीचको घुस लेनदेन प्रकरणको विषयले सदनमा समेत प्रवेश पाएको छ । 

प्रतिनिधिसभाको बिहीबार बसेको बैठकको बिशेष समयमा सांसद लीलादेवी सिटौलाले घुस प्रकरणले नेपालको न्यायपालिकाको अवस्था उजागर गरेको बताइन् । 

राज्यको कोषबाट तलबभत्ता बुझ्नेहरू सेटिङमा पैसा कमाउन लागेको उनको भनाइ छ ।

सांसद गजेन्द्र बहादुर महतले न्यायालय भष्टाचारको अखडा बनिरहेको भन्दै यसबारेमा संसद पनि बन्धक भएर बस्न नहुने बताए ।

सांसद शेरबहादुर तामाङले आफूले संसद सचिवालयमा दर्ता गरेको गाँजा खेती नियमन तथा व्यवस्थापन विधेयक अहिलेसम्म छलफलमा नल्याएको भन्दै आपत्ति जनाए ।

सांसद तामाङले संसद नियमावली अनुसार विधेयक दर्ता भएको चार दिनभित्र विधेयकको प्रति सबै सांसदलाई दिनुपर्ने भएपनि उपलब्ध नगराएको गुनासो गरे । 

सांसद शक्ति बस्नेतले मौलिक हकको रुपमा व्यवस्था गरिएका व्यवस्थालाई कानूनीरुप दिन ढिलाई भइरहेको गुनासो गरे ।

भएको के थियो ?

मंगलबार न्यायाधीश राजकुमार कोइराला र अधिवक्ता रुद्र पोखरेलबीच व्यवसायी इच्छाराज तामाङलाई धरौटीमा छुटाउनका लागि घूस लेनदेनको अडियो वार्ता सार्वजनिक भएको थियो । 

संवादमा कोइराला र पोखेरेलबीच इच्छाराज तामाङलाई धरौटीमा छुटाउनका लागि मोलमोलाई गरिएको छ । 

अडियोमा तामाङलाई धरौटीमा छुटाउन दश करोडको मोलमोलाइ भएको सुनिएको छ । 

सिभिल बचत तथा ऋण सहकारीको बचत रकम हिनामिना गरेको अभियोगमा तामाङ हाल पुर्पक्षका लागि थुनामा रहेका छन् । 

न्यायाधीश कोइरालाले भने सामाजिक सञ्जालमार्फत आफूबाट कुनै अनुचित काम नभएको दाबी गरेका छन् । उनले छानविनमा सहयोग गर्ने पनि उल्लेख गरेक छन् ।