काठमाडौं : प्रधानमन्त्री केपी ओलीले राजनीतिक दल र तीनका नेताहरुमा अनुशासनहीन, अराजक बढ्दै गएको बताएका छन् ।

तेश्रो राष्ट्रिय महिला अधिकार दिवसका अवसरमा बालुवाटारमा आयोजित कार्यक्रमलाई सम्बोधन गर्दे उनले पार्टी निर्देशनविपरीत फ्लोर क्रस गर्ने, पार्टी फोड्ने, पार्टीका विरुद्ध जाने, अर्के उम्मेदवार उठाउने जस्ता दुनियाँको कुनै इतिहासमा नभएको घटना नेपालमा भएको बताएका छन् ।

उनले आफ्नै पार्टीको सरकार ढाल्नका लागि संसदमा मतदान नगर्ने, कहिले अर्को सरकार बनाउन गरिएको कसरत दलीय अनुशासन र संसदीय प्रणालीविरुद्ध भएको टिप्पणी गरे ।

ओलीले पार्टीभित्रैका नेताबाट देशको लागि अनिष्ठ हुने काम भइरहेको बताएका छन् । पार्टीका नेता माधवकुमार नेपालप्रति इंगित गर्दै नेतृत्व नै धमिलो भएपछि कार्यकर्तामा त्यसको प्रभाव पर्नु स्वभाविक भएको ओलीको टिप्पणी छ ।

विभिन्न चरणको आन्दोलन र राजनीतिक योगदानका कारण संवैधानिक र कानूनी हिसाबले राज्यका सबै अंगमा महिलाको ३३ प्रतिशत सुनिश्चितताको उपलब्धी प्राप्त भएपनि कतिपयलाई यही उपलब्धि चित्त नबुझेकोप्रति प्रधानमन्त्रीको गुनासो छ ।