काठमाडौँ – लोकसेवा आयोगबाट खुलाइएको विज्ञापनमा आवेदन फाराम भर्ने मिति सकिन लाग्दा भर्नेको सङ्ख्या बढेको छ।

प्रतिनिधिसभाको राज्य व्यवस्था तथा सुशासन समितिले विज्ञापन रद्द गर्ने निर्देशन दिएपछि केही दिन फाराम भर्नेको सङ्ख्यामा कमी आए पनि अहिले फाराम भर्ने समय सकिन लाग्दा भने सङ्ख्यामा वृद्धि भएको हो।

आयोगका सूचना अधिकारी देवीप्रसाद सुवेदीले फाराम भर्ने समय सकिन लाग्दा आवेदन दिनेको सङख्यामा वृद्धि भएको बताए। उनका अनुसार अहिले प्रतिमिनेट सय जनाले फाराम भरिरहेका छन्। एकै पटक धेरैले फाराम भर्दा आयोगको सर्भरमा चाप देखिएको छ।

‘पहिले समितिको रद्द गर्ने निर्देशनपछि परीक्षा हुने हो वा होइन भनेर परीक्षार्थीले फाराम भरेका थिएनन्’ उनले भने, ‘अहिले तीन दिनदेखि आयोगको सर्भरमा चाप देखिएको छ।’ एकै पटकमा धेरै जनाले फाराम भर्दा सर्भरमा पनि बेलाबेलामा प्राविधिक समस्या आउने गरेको छ। आयोगले विगत तीन वर्षदेखि अनलाइन फाराम शुरु गरेको हो।

मङ्गबार राति १२ बजेसम्म एकल दस्तुर र असार १० गतेसम्म दोब्बर दस्तुरमा फाराम भर्न सकिने छ। आयोगले ५ सय १५ स्थानीय तहका लागि विभिन्न ९ हजार १ सय ६१ पदका लागि आवेदन फाराम माग गरेको छ।

उपसचिव सुवेदीका अनुसार आयोगले अपेक्षा गरेअनुसार परीक्षार्थीले फाराम नभरेको बताए। ‘आयोगले यति धेरै सङ्ख्यामा आवेदन माग गर्दा करीब तीन लाख बढीले भर्ने अपेक्षा गरेका थियौँ’ उनले भने, ‘अहिलेको सङ्ख्या हेर्दा त्यो नपुग्ने देखिन्छ। अझै केही दिन फाराम भर्ने समयमा भएकोले सङ्ख्यामा वृद्धि भने हुन्छ।’

उनका अनुसार अहिलेसम्म एक लाख ६२ हजार ३ सय ३३ आवेदन फाराम भरेकामा महिलातर्फ ३९ हजार ६ सय ४६, जनजाति १८ हजार ५१, मधेशी १० हजार १४, दलित एक हजार २ सय ३०, अपाङ्ग ७३ र पिछडिएको ५० जना रहेका छन्।